ZAMONAVIY AXBOROT MAKONIDA RAMZ VA BELGILARNING MADANIY-TARIXIY MA’NOLARI TAHLILI

Annotatsiya

Maqolada zamonaviy axborot makonida faoliyat ko‘rsatayotgan ramz va belgilar madaniy-tarixiy ma’nolarini integrativ tarzda o‘rganiladi. Yondashuv madaniy semantikaning qatlamli modeli (madaniy sema — madaniy konnotatsiya — madaniy konsept — madaniy fon) hamda strukturaviy va antropologik nuqtaiy nazarlarni uyg‘unlashtiruvchi differensial-integrativ metodga tayanadi. Amaliy qismda keng qo‘llanadigan grafik va piktografik belgilar madaniy-tarixiy qatlamlari va pragmatik funksiyalari tahlil qilinadi: “yurak” — layk indikatori sifatida, “bosh barmoq yuqoriga”, “qulf” — xavfsizlik/yopiq holat indeksi sifatida, “lupa” — qidiruv metaforasi sifatida, “skrepka” — ilova belgisi sifatida, “qo‘ng‘iroq” — bildirishnoma, “bulut” — taqsimlangan saqlash metaforasi sifatida, shuningdek QR-kod — sanoat piktogrammasi sifatida, ommaviy kommunikatsiyaga ko‘chgan belgi sifatida ko‘rib chiqiladi. Har bir belgi madaniy xotira va “ma’no portlashlari” prinsipini namoyon etadi: tarixiy konnotatsiyalar raqamli amaliyotlar ta’sirida qayta kodlanadi, baholovchi valentlik esa janr, media platforma hamda auditoriya ideologik yo‘nalishlariga qarab o‘zgaradi.