TALABALAR MUSTAQIL TA’LIMINI SHAKLLANTIRISHNING MUHIM PEDAGOGIK OMILLARI

Annotatsiya

Maqolada talabalar kasbiy tayyorgarligini rivojlantirishda mustaqil ta’limni tashkil etishning mazmun-mohiyati va hozirgi kundagi muammolari hamda istiqbollari, ya’ni oliy ta’lim bilan qamrov darajasini oshirish, xalqaro standartlar asosida yuqori malakali, kreativ va tizimli fikrlaydigan, mustaqil qaror qabul qila oladigan kadrlar tayyorlash haqida fikr yuritilgan. Ta’lim sifati va samaradorligini oshirishda o‘qitishning zamonaviy usullari, shakl va vositalari, o‘yin texnologiyalari, muammoli o‘qitish, xususan, mustaqil ta’limning noan’anaviy metodlari muhim o‘rin tutishi haqida keng yoritilgan. Shu bilan birga, ularda mustaqillik, faollik va qiziquvchanlik xususiyatlari shakllantirilishga alohida urg’u berilgan. Bu uch xususiyat o‘zaro aloqadorlikda va mutanosiblikda mustaqil ta’limga undovchi xususiyatlar hisoblanadi. Mustaqillik bunda talabalarning muammoni hal qilishga, mavzuni o‘rganish va amaliy vazifalarni bajarishlariga mustaqil holda ijodiy yondoshishlari tushuniladi. Faollik bunda talabalarning jarayonlarga faol, ishtiyoq bilan kirishishlari tushuniladi. Qiziquvchanlik bunda talabalarning bilim olishga, ko‘nikma va malakalarini shakllantirish jarayoniga qiziqish, intilish bilan yondoshishlari tushuniladi.